მიმდინარე წლის 22 აპრილიდან საქართველოს საუნივერსიტეტო სპორტის ფედერაცია, საქართველოს განათლების, მეცნიერების, კულტურისა და სპორტის სამინისტროს მხარდაჭერით, ატარებს სტუდენტური უმაღლესი ლიგის თამაშებს ფუტსალში საქართველოში აკრედიტებული უმაღლესი სასწავლებლების გუნდებს შორის.

გუშინ, 1 ივლისს, ნახევარფინალურ მატჩში ერთმანეთს გურამ თავართქილაძის სახელობის თბილისის სასწავლო უნივერსიტეტისა და კავკასიის საერთაშორისო უნივერსიტეტის საფეხბურთო გუნდები დაუპირისპირდნენ.

ნახევარფინალური მატჩი ძალზედ საინტერესო, დაძაბულ ვითარებაში წარიმართა. ბოლო წუთამდე ანგარიში თანაბარი იყო - 1 : 1. არავინ იცოდა, ვის გაუმართლებდა ფორტუნა.

მატჩის ბოლო წუთზე კავკასიის საერთაშორისო უნივერსიტეტის ფეხბურთელებმა შეძლეს და გამარჯვების გოლიც გაიტანეს.

გურამ თავართქილაძის სახელობის თბილისის სასწავლო უნივერსიტეტის საფეხბურთო გუნდს 3-4 საპრიზო ადგილისათვის მოუწევს ბრძოლა და მისი მეტოქე სოხუმის სახელმწიფო უნივერსიტეტის გუნდი იქნება.

პირველი საპრიზო ადგილისათვის კი ივ. ჯავახიშვილის სახელობის თბილისის სახელმწიფო უნივერსიტეტისა და კავკასიის საერთაშორისო უნივერსიტეტის საფეხბურთო გუნდები დაუპირისპირდებიან.